图：谭志源话自己好怕丑，唔敢问郎平攞签名
文 郑晴
国家女排队员系唔少人心中女神，连政制及内地事务局局长谭志源（Raymond）都化身超级粉丝，连续两日追星。Raymond话畀郑晴知，佢除咗喺礼宾府晚宴与一众女排女神Selfie外，寻日仲同香港排球会一齐同女排成员共进午餐。Raymond话，前日喺礼宾府见唔到女排教练郎平，一直有少少遗憾，寻日终于见到真人，兴奋到不得了。不过，佢话自己好怕丑，唔敢问郎平攞签名喎。
原来Raymond由中学开始就打排球，对排球运动情有独钟，睇咗几十年排球，第一次咁近接触女排！Raymond兴奋之馀，话会努力争取喺明年香港回归20周年之际搞大型体育活动，争取叫女排嚟香港进行表演赛！
工联会小花陈颖欣都系精英们嘅超级Fans，仲准备咗排球、羽毛球、泳帽、乒乓球拍等索取签名。不过，小花就无缘见到郎平，但攞到女排主攻手朱婷同埋羽毛球教练张军嘅亲笔签名。原来张军系2000年悉尼奥运混双冠军身份嚟香港，当年得十岁嘅小花攞到签名，但估唔到今次会有机会见到佢。小花会将呢次张即影即有相摆喺办事处，做嘢攰嘅时候可激励下自己，直言见到同佢嘅合照就会好开心。
谌龙签名球失而复得
图：谌龙亲笔签名羽毛球
郑晴寻日同大家讲，有个乌龙义工唔见咗里约奥运羽毛球男单冠军谌龙亲笔签名嘅羽毛球，仲叫大家喺尖沙咀至红磡一带寻下宝。不过，郑晴听闻呢位义工竟然咁好彩，系海景嘉福酒店搵返个羽毛球喎，佢仲特登影埋畀郑晴睇，有图有真相咁话。谌龙个签名真系签得几有型，果然字如其人。最后，郑晴真系要提醒下呢位迷妹，失而复得嘅事唔系成日都有，要好好珍藏呢个冠军签名！
宅男必看！
图：惠若琪（右）自爆单身兼帮队友徵婚/资料图片
内地里约奥运精英团访港行程满满，但中国女排队长、元气少女惠若琪忙里偷闲，与一众粉丝进行网上直播，吸引过百万粉丝观看，女神果然魅力非凡！惠若琪喺直播大叹今次嚟香港行程十分紧密，每日签名都要签三、四百个，但佢都好想去行街买嘢畀屋企人。
除咗同网友倾偈，惠若琪还和大家玩游戏，仲清唱奥运赛前听嘅饮歌《年轻的战场》，兼自爆单身添。佢透露，希望另一半可以同佢差唔多高，要有1.9米，同埋系个男人未婚就OK。队长直播嘅时候还帮队友徵婚，仲一直照顾中国女排队中19岁嘅成员龚翔宇同前女子国家排球队队员孙悦的细囡，真系冧爆屏幕前嘅广大宅男！
捕获偶像可爱一面
万众期待嘅国家奥运精英运动员访港，不少市民及内地旅客仲专程到代表团下榻嘅酒店守候，望能一睹偶像风采，甚至希望得到一个合照、签名的机会。
有喺海景嘉福酒店协助接待精英团嘅义工同郑晴讲，超级丹林丹返抵酒店后就立刻返房休息，连续两日午宴都没出现，所以好难捕获到佢，搞到一班少女义工及粉丝好失望。但系寻日就有粉丝捕获到换咗兔兔便服及戴住眼镜嘅跳水皇后吴敏霞，佢亦来者不拒，与粉丝等拍照留念，亲民形象不改。
而人气爆灯嘅洪荒少女傅园慧寻日也被市民喺街头野生捕获，佢着住蓝色T恤，红色短裤，戴住cap帽，仲拎住有迪士尼图案嘅胶袋。傅园慧今次无得去迪士尼，唔知系唔系又有粉丝送公仔畀佢呢？
